ਫਿਲੌਰ (ਅਮਨ ਬੱਗਾ): ਜਲੰਧਰ ਲੋਕਸਭਾ ਹਲਕੇ ਤੋਂ ਸ੍ਰੋਮਣੀ ਅਕਾਲੀ ਦਲ ਤੇ ਭਾਜਪਾ ਦੇ ਸਾਂਝੇ ਉਮੀਦਵਾਰ ਡਾ. ਚਰਨਜੀਤ ਸਿੰਘ ਅਟਵਾਲ ਦੇ ਹੱਕ ‘ਚ ਫਿਲੌਰ ਹਲਕੇ ਦੇ ਪਿੰਡਾਂ ਵਿਰਕ, ਦੁਸਾਂਝ ਕਲਾਂ, ਗੰਨਾ ਪਿੰਡ, ਦਸਮੇਸ਼ ਨਗਰ, ਅਕਾਲਪੁਰ, ਰਾਏਪੁਰ ਰਾਈਆਂ, ਧੰਨਕ ਮਾਜਰਾ, ਦਿਆਲਪੁਰ, ਟੈਗਰ, ਦਾਲੀਵਾਲ, ਸੁਲਤਾਨਪੁਰ, ਥਾਲਾ, ਰਸੂਲਪੁਰ, ਬੰਸੀਆ ਢੱਕ, ਭੈਨੀ, ਨੈਨੋ ਮਾਜਰਾ, ਲਾਡੀਆਨਾ, ਮਿਓਵਾਲ, ਨਾਗਲ, ਮੁਠੱਡਾ ਕਲਾਂ, ਮੁਥਾੜਾ ਖੁਰਦ, ਕੋਟਲੀ ਖਾਇਆ, ਬਾਰਸਿੰਘ ਪੁਰਾ ਆਦਿ ‘ਚ ਸ੍ਰੋਮਣੀ ਅਕਾਲੀ ਦਲ ਮਹਿਲਾ ਵਿੰਗ ਸਰਕਲ ਅਪਰਾ ਦੀ ਪ੍ਰਧਾਨ ਮੈਡਮ ਨਵਜੋਤ ਕੌਰ ਸੰਧੂ, ਸਰਕਲ ਗੋਰਾਇਆ ਦਿਹਾਤੀ ਦੀ ਪ੍ਰਧਾਨ ਮੈਡਮ ਬਲਜੀਤ ਕੌਰ, ਸਰਕਲ ਫਿਲੌਰ ਦਿਹਾਤੀ ਦੀ ਪ੍ਰਧਾਨ ਮੈਡਮ ਸੁਰਿੰਦਰ ਕੌਰ ਤੇ ਸਰਕਲ ਰੁੜਕਾ ਕਲਾਂ ਦੀ ਪ੍ਰਧਾਨ ਮੈਡਮ ਕੁਲਵਿੰਦਰ ਕੌਰ ਦੀ ਸਾਂਝੀ ਅਗਵਾਈ ‘ਚ ਭਰਵੀਂ ਮੀਟਿੰਗਾਂ ਅਤੇ ਡੋਰ ਟੂ ਡੋਰ ਕੰਪੇਨ ਕੀਤੀ ਗਈ।
ਇਸ ਮੌਕੇ ਡਾ. ਚਰਨਜੀਤ ਸਿੰਘ ਅਟਵਾਲ ਦੀ ਨੂੰਹ ਬੀਬੀ ਧੰਨਵੰਤ ਕੌਰ ਅਟਵਾਲ ਪਤਨੀ ਜਸਜੀਤ ਸਿੰਘ ਅਟਵਾਲ (ਰੌਕੀ) ਨੇ ਵਿਧਾਇਕ ਬਲਦੇਵ ਸਿੰਘ ਖਹਿਰਾ ਦੀ ਪਤਨੀ ਮੈਡਮ ਭਾਵਨਾ ਖਹਿਰਾ ਦੇ ਨਾਲ ਲੋਕਾਂ ਤੋਂ ਉਮੀਦਵਾਰ ਡਾ. ਚਰਨਜੀਤ ਸਿੰਘ ਅਟਵਾਲ ਦੇ ਹੱਕ ‘ਚ ਵੋਟਾਂ ਮੰਗੀਆਂ। ਇਸ ਦੌਰਾਨ ਭਰਵੀਂਆਂ ਮੀਟਿੰਗਾਂ ਨੂੰ ਸੰਬੋਧਨ ਕਰਦਿਆਂ ਬੀਬੀ ਧੰਨਵੰਤ ਕੌਰ ਅਟਵਾਲ ਤੇ ਮੈਡਮ ਭਾਵਨਾ ਖਹਿਰਾ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਨੇ ਦੇਸ ਦਾ ਵਿਕਾਸ ਕਰਨ ਦੀ ਥਾਂ ਲੋਕਾਂ ਨੂੰ ਗੁੰਮਰਾਹ ਹੀ ਕੀਤਾ ਹੈ ਪ੍ਰੰਤੂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣੇ ਕਾਰਜਕਾਲ ਦੌਰਾਨ ਦੇਸ ਨੂੰ ਵਿਕਾਸ ਦੀਆਂ ਲੀਹਾਂ ਵੱਲ ਨੂੰ ਤੋਰ ਦਿੱਤਾ ਹੈ ‘ਤੇ ਸਾਨੂੰ ਚਾਹੀਦਾ ਹੈ ਕਿ ਅਸੀ ਇਸ ਵਿਕਾਸ ਦੀ ਲਹਿਰ ਨੂੰ ਹੋਰ ਤੇਜ ਕਰਨ ਲਈ ਇਕ ਵਾਰ ਮੁੜ ਨਰਿੰਦਰ ਮੋਦੀ ਨੂੰ ਪ੍ਰਧਾਨ ਮੰਤਰੀ ਬਣਾਉਣ ਲਈ ਆਪਣੀ ਇਕ-ਇਕ ਵੋਟ ਭੁਗਤਾਈਏ।
ਉਹਨਾਂ ਦੋਸ਼ ਲਗਾਇਆ ਕਿ ਕਾਂਗਰਸ ਪਾਰਟੀ ਨੇ ਪੰਜਾਬ ਦੀ ਸੱਤਾ ਸੰਭਾਲਦੇ ਹੀ ਵਿਕਾਸ ਦੇ ਸਾਰੇ ਕਾਰਜਾਂ ‘ਤੇ ਪੂਰੀ ਤਰ੍ਹਾਂ ਰੋਕ ਲਗਾ ਦਿੱਤੀ ਹੈ, ਜਿਸ ਕਾਰਨ ਜਲੰਧਰ ਲੋਕ ਸਭਾ ਹਲਕੇ ਦੇ ਸਹਿਰੀ ਤੇ ਪੇਂਡੂ ਖੇਤਰਾਂ ‘ਚ ਵਿਕਾਸ ਨਾਂਅ ਦੀ ਕੋਈ ਵੀ ਚੀਜ ਨਹੀਂ ਰਹਿ ਗਈ ਹੈ। ਉਹਨਾਂ ਔਰਤਾਂ ਨੂੰ ਅਪੀਲ ਕੀਤੀ ਕਿ ਉਹ ਜਲੰਧਰ ਹਲਕੇ ਤੋਂ ਗਠਜੋੜ ਦੇ ਉਮੀਦਵਾਰ ਚਰਨਜੀਤ ਸਿੰਘ ਅਟਵਾਲ ਨੂੰ ਭਾਰੀ ਬਹੁਮਤ ਨਾਲ ਜਿਤਾਉਣ। ਇਸ ਦੌਰਾਨ ਹਾਜਰ ਵੱਖ ਵੱਖ ਪਿੰਡਾਂ ਦੀਆ ਔਰਤਾਂ ਨੇ ਉਹਨਾਂ ਨੂੰ ਭਰੋਸਾ ਦਿੱਤਾ ਕਿ ਉਹ ਆਪਣੀ ਇਕ-ਇਕ ਵੋਟ ਗਠਜੋੜ ਦੇ ਉਮੀਦਵਾਰ ਅਟਵਾਲ ਦੇ ਹੱਕ ‘ਚ ਭੁਗਤਾਉਣਗੇ।
